धनगढी-आगामी शुक्रबारदेखि तीन दिनसम्म भारीदेखि अतिभारी वर्षाको पूर्वानुमान गरिएपछि सुदूरपश्चिम प्रदेशमा विपद् प्रतिकार्यका लागि सुरक्षा तथा प्रशासनिक संयन्त्रलाई तयारी अवस्थामा राखिएको छ।
जल तथा मौसम विज्ञान कार्यालय, अत्तरियाका निमित्त प्रमुख सञ्जयकुमार शाहका अनुसार बंगालको खाडीमा रहेको न्यूनचापीय क्षेत्र शक्तिशाली बन्दै गएकाले त्यसको प्रभाव नेपालमा पर्ने सम्भावना छ । सम्भावित वर्षाका कारण उच्च जोखिममा रहेका बझाङ, बाजुरा, दार्चुला र अछाममा ‘अलर्ट’ जारी गरिएको उनले बताए। ‘चुरे क्षेत्रमा समेत भारी वर्षा हुन सक्ने भएकाले जोखिमयुक्त क्षेत्रमा आवश्यक सतर्कता अपनाउन भनिएको छ,’ शाहले भने ।
सुरक्षा निकाय तयारी अवस्थामा
भारी वर्षाका कारण हुन सक्ने बाढी, पहिरो र डुबानको जोखिमलाई मध्यनजर गर्दै स्थानीय प्रशासनसँगै सुदूरपश्चिमका सुरक्षा निकायले विपद् प्रतिकार्यको तयारी तीव्र पारेका छन्। सशस्त्र प्रहरी बल श्री नं. ७ वैद्यनाथ बाहिनी, अत्तरियाका सशस्त्र प्रहरी वरिष्ठ उपरीक्षक रमेशकुमार पाण्डेयले मौसमसम्बन्धी सूचनाका आधारमा आवश्यक जनशक्ति तथा उद्धार सामग्री तयारी अवस्थामा राखिएको बताए। नेपाली सेनाले पनि सम्भावित विपद्का घटनामा उद्धार तथा राहतका लागि आवश्यक तयारी पूरा गरेको जनाएको छ । प्रभावितको उद्धार तथा राहतका लागि सुदूरपश्चिम पृतनामा हेलिकप्टरसमेत तयारी अवस्थामा राखिएको सेनाले जनाएको छ।
धनगढीमा नगर प्रहरीको माइकिङ
भारी वर्षाको सम्भावनापछि धनगढी उपमहानगरपालिकाले नगरवासीलाई सतर्क रहन आग्रह गर्दै टोलटोलमा माइकिङ सुरु गरेको छ। वर्षाका कारण धनगढी क्षेत्रका नदी तथा खोलानालामा पानीको सतह बढ्न सक्ने तथा नदी तटीय क्षेत्रमा बाढी र डुबानको जोखिम हुन सक्ने उपमहानगरपालिकाको विपद् व्यवस्थापन शाखाले जनाएको छ।
‘नदी तथा खोलानाला आसपास र जोखिमयुक्त क्षेत्रमा बसोबास गर्ने नागरिकलाई विशेष सतर्कता अपनाउन आग्रह गरिएको छ,’ उपमहानगरपालिकाले जनाएको छ। उपमहानगरपालिकाले नगर प्रहरीलाई टोलटोलमा परिचालन गरी बाढी, डुबानलगायतका सम्भावित जोखिमबाट सुरक्षित रहन सचेत गराइरहेको छ। जोखिमयुक्त क्षेत्रमा नजान, नदी तथा खोलाको किनारमा नबस्न र मौसमसम्बन्धी सूचना निरन्तर लिन उपमहानगरपालिकाले नगरवासीलाई आग्रह गरेको छ।
